| Quotation |
Possumus autem et aliter de arundine intellegere, quia multiplex sensus spiritalis est.
Per arundinem quae uacua est et sine medulla, populus gentium demonstratus aduertitur, qui
dudum sine medulla diuinae legis fuit, uacuus a fide, inanis a gratia.
Huiusmodi ergo arundo, id est populus gentium, in dextera domini collocatur, quia a sinistris iam
habebatur populus iudaeorum qui persequebatur christum. In arundine autem populum gentium significari, esaias ostendit cum ita de domino loqueretur dicens:
arundinem quassatam non confringet, id est populus gentium, qui, licet quassatus a diabolo
uideretur, a christo tamen non confractus est, sed solidatus. |
