| Quotation |
Quod autem introduxit: statuit excelsus terminos gentium secundum numerum angelorum Dei, non
ita intelligendum, ut opinor, quasi tot gentes et lingue sint quot angeli Dei, sed tot sunt termini
gentium quot numerus est angelorum, qui specialiter principes earum constituti sunt.
SI AVTEM QVIS DIXERIT, ET QVOMODO HEBREORVM POPVLVS REDVCTVS EST SOLVS IN
THEARCHICAS ILLVMINATIONES, hoc est: si quis interrogauerit quomodo hebraicus populus solus
in diuinas illuminationes, in cultum uidelicet et cognitionem ueri Dei, reductus est, ceteris nationibus
in tenebris ignorantie atque perfidie detentis ante incarnationem Dei Verbi, dum omnes similiter
ductores angelos sicut Hebrei haberent, RESPONDENDVM QVIA NON ANGELORVM RECTAS
SCIENTIAS ACCVSARI OPORTET ALIARVM GENTIVM IN NON EXISTENTES ERRORE.
Respondendum, inquit, quia neminem oportet accusare rectas scientias, hoc est, recta iudicia
sanctorum angelorum, propter errorem aliarum gentium in non existentes, in falsos uidelicet, deos
qui non sunt, quoniam demones eorumque ludibria, miserrimarumque rationabilium animarum
irrationabilia machinamenta probantur esse. |
