| Quotation |
quid est? ager quotiens longa incuria siluescit, et toto luxuriae agrestis sordescit horrore, peritissimi
cultoris utique semper aperitur et purgatur incendio, ac studio benigno cultor ignis adponitur, ut
exustis sentibus reueletur facies prima campi, praestetur agricolae libertas, fiat facilis uia uomeri, sit
germinis ferax sterilis diu terra, et longa ac maesta otia laeto laetissima iam repenset in fructu.
Ergo ubi iudaicus caespes continuo aratro legis et iugi cultu effetatus ad inopiam, non respondit
germini, non labori, sed pro tritico lolium reddidit, protulit pro uitibus spinas, christus ad sata
gentium diuini cultus conuertit industriam, ac diu oppressa dumis nationum cupiens noualia
purgare, ignem mittit primum maximus magister in terram, et quicquid naturalis squalefecerat luxus,
quicquid arefecerat brumalis rigor, artifici depurgat et consumit incendio, quatenus sola, longa,
exhausta ieiunio, ipso suo cinere saginata pinguescerent, et post diuturnam duritiem tenera
redderentur et mollia, ac sic euangelico apta cultro semini redderentur commoda, et felici sulco iam
redderent tricesimum, sexagesimum, centesimum fructum.
Sed hic ipse cultus non est nouus agriculae ueteris et caelestis, nam legem pangere, gratiam serere,
ignis semper opere consueuit. |
