Quotation |
1. hoc enim dicit, quia cum Farao - quod nomen regium erat apud Aegyptios, sicut et apud
Romanos reges Augusti appellantur - hic ergo Farao, cum tantis malis esset reus, ut vita indignus
esset, numquam correcturus, ne se aut merito vivere aut deum, quem saepe fallendum censebat, ad
vindictam dandam inpotentem putaret, audit a deo: ad hoc te servavi, ut ostendam in te virtutem
meam et ut adnuntietur nomen meum in universam terram, ut in isto ceterae gentes addiscerent
non esse alium deum praeter hunc, qui Iudaeorum erat et factus est Christianorum; quamvis et illi
Christiani fuerint et nos nunc simus Iudaei propter Iudam, ex quo Christus est secundum carnem,
quia Iudaei veteres sperantes futurum Christum redemptorem Christiani erant. |