| Quotation |
Eo autem tempore miserat Ecgberchtus Cantuariorum rex de Brittannia electum ad episcopatus officium uirum nomine Uighardum, qui a Romanis beati papae Gregorii discipulis in Cantia fuerat omni aecclesiastica institutione sufficienter edoctus; cupiens eum sibi Romae ordinari episcopum, quatinus suae gentis et linguae habens antistitem, tanto perfectius cum subiectis sibi populis uel uerbis imbueretur fidei uel mysteriis; quanto haec non per interpretem, sed per cognati et contribulis uiri linguam simul manumque susciperet. Qui uidelicet Uicghardus Romam ueniens, cum cunctis qui secum uenere comitibus, antequam
gradum pontificatus perciperet, morbo ingruente defunctus est.
At uero papa apostolicus, ne legatariis obeuntibus legatio religiosa fidelium fructu competente careret, inito consilio elegit de suis quem Brittannias archiepiscopum mitteret, Theodorum uidelicet saeculari
simul et aecclesiastica philosophia praeditum uirum, et hoc in utraque lingua, Greca scilicet et Latina,
dato ei collega et consiliatore uiro aeque strenuissimo ac prudentissimo Adriano abbate. |
