| Quotation |
Sic sic hic Christi resplendens lumine Amandus,
Illius ut cunctis fulgeret in aede ministris
Exueretque homines tetra caligine multos,
Gentibus et variis divine semina verbi
Spargeret et meteret Christo auxiliante maniplos,
Principis imperiis compulsus pontificumque
Devictus monitis est factus episcopus et, quod
Iam pridem meritis fuerat, tunc ordine sumpsit.
Nec sedem propriam suscepit pontificalem,
Sed veluti Paulus populos adgressus eoos,
Sic iste occiduas partes transmissus adivit,
Gentibus et sparsis sparsit pia verba salutis. (...)
Inde salutiferis dum sanctus gressibus iret,
Spargebat verbum populis et sancta docebat
Gentibus insinuans aeterni praemia regni,
Christicolis turmis quae dona parentur in astris
Atque malis poenae quae conserventur in antris. (...)
Quaerens ergo modum, quo tantos tollere posset
Hostis ab insidiis populos saevoque tyranno
Qualiter excuteret praedam spoliumque referret,
Dantem iura gregi Noviomi ex urbe regendo
Aicharium petiit, quo cernuus iret in aulam
Regis (tunc etenim validis tractabat habenis
Francorum regnum Dagobertus rector opimum),
Illius et iussu sibimet mandata referret,
Quatinus, in sacro qui se non fonte lavare
Ex illis vellet, conpulsus delueretur. |
