| Quotation |
non tamen inceptum fuso est cum sanguine bellum. / Geisirith ille potens nam dux praecesserat agmen / ductoris iussu, sapiens et Amantius una, / hostiles temptare locos, perquirere valles / et solito planare vias. nunc aggere celso / Romanae sistunt acies, gentesque nefandas / expectant oculis, magno quae ferre magistro / mente gerunt dubia. nequeunt tolerare tumultus / nec densos lustrare locos. quis cernere posset / milia tanta virum? sic si lucusta sub astris / Austro flante cadit Libycos diffusa per agros / vere sub extremo, vel cum Notus aethere ab alto / in mare praecipitem
magnoque a turbine raptam / ire iubet: dubiis horrescunt corda pavore / agricolis, segetes ne conterat horrida pestis, / neu vastet fructus teneros hortosque virentes, / mollibus aut ramis florentem laedat
olivam. iamque pedem retrahens ibat Romana iuventus, / ductori responsa ferens. hanc proximus hostis / circumdat levitate sua. iam dura subibant / agmina. |
