Quotation |
quae enim arma Romana uiderunt Caesaream inhabitantes Iudaei, quorum feriato die sabbati
inter sollemnes nostrorum cultus sacrorum multitudo gentilium Caesariensium repentino
quodam impetu et misso desuper furore succensa XX milia deleuit, omnes fugauit, ut totam urbem
exinaniret? nonne totam Syriam quaedam impleuit dementia, ut Iudaei atque gentiles in iisdem urbibus siti et incolatus gratia sibi prius nexi postea inter se armis colliderent, quo Romanis uadum futurae uictoriae constitueretur?
nam quid de Scythopoli loquar? quo Iudaei primo contenderant, ut gentilem populum praeuenirent, ne quid aduersum nostros exemplo ceterarum urbium machinaretur. |