| Quotation |
34 ANNO IX IUSTINI IMPERATORIS, QUI EST LEOUEGILDI REGIS SEPTIMUS ANNUS, Cosdroes
Persarum imperator cum nimia multitudine exercitus ad uastandos Romanorum terminos
promouet, cui Iustinianus dux Romane milicie et magister militum orientis a Thiberio
destinatus bellum parat, et in campos qui inter Daras et Niziuios ponuntur forti pugna congressus,
habens secum gentes fortissimas que barbaro sermone Herinam nuncupantur, memoratum
imperatorem bello superat, quo cum suo exercitu in fugam uerso, castra eius peruadit et prouincie
Perside fines uictor Iustinianus uastat, exuuiasque eorum pro triumpho Constantinopolim dirigit,
XXIV elephantos inter cetera, qui magnum spectaculum Romanis in regia urbe exibuerunt,
preda uero de manubiis Romanorum, Persarum multitudo, ad nimiam utilitatem nummo
publico uenumdate sunt.
35 Leouegildus rex Aregenses montes ingreditur, Aspidium loci seniorem cum uxore et filiis captiuos ducit, opesque eius et loca in suam redigit potestatem.
36 Aramundarus Sarracenorum rex Constantinopolim uenit et cum scemate suo Thiberio principi cum
donis barbarie occurrit, qui a Thiberio benigne susceptus et donis obtimis adornatus ad patriam abire permissus est. |
