| Quotation |
Iam Romani potentes esse coeperant. bellum enim in centesimo et tricesimo fere miliario ab
urbe apud Samnitas gerebatur, qui medii sunt inter Picenum Campaniam et Apuliam; gentem,
si opulentiam quaeras, aureis et argenteis armis et discolori veste usque ad ambitum ornatam; si
insidiarum fallaciam, saltibus fere et montium fraude grassantem; si rabiem ac furorem, sacrilegis
humanisque hostiis in exitum orbis agitatam; si pertinaciam, sexies rupto foedere ipsis hostibus
animosiorem. denique priusquam cum Romanis confligerent, Alexandrum regem Epirotarum germanum
Olympiae matris Alexandri Magni, qui traiectis in Italiam copiis bellum adversus Romanos
parabat, Lucanis suffragium ferentes maximo bello in Lucania vicere, in quo et ipse Alexander Epirota extinctus est. Romani igitur adversum Samnitas pro Campanis et Sidicinis bellum suscepere. |
