| Quotation |
Hunc Originem cum Romani legerent (fidelis nisi quia gentilis erat) inter fidelium libros
suscipiendum decreuerunt.
hunc namque morem ex apostolicorum auctoritate uirorum Romana tenuit ac seruauit ecclesia,
ut christianorum libri philosophorum repositi a gentilium scriptis haberentur.
cum enim necesse haberent homines in liberalibus saecularis litteraturae studiis nati educatique, ut
sapientiae ipsius consuetudinem fideles adhuc retinerent, uidentes ecclesiastici doctores non potuisse
eos ab hac quam coeperant intentione deuelli, simul etiam quia maxima ex parte eloquentes uiri ad
conponenda ornandaque <scripta> essent celestis et diuinae sapientiae profuturi, si conuersi ad
Dominum et in sua eloquentia permanentes praua ad recta studia uerterent, hoc consultissime
statuerunt, ut duabus librariis conpositis, una fidelium philosophorum libros et altera gentilium
scripta contineret, ne fidelibus infidelia conmiscentes nulla discretio inter munda fieret et inmunda, ut
si quis uellet gentilis legere, semota haberet. |
