| Quotation |
Anno ab incarnatione Domini octingentesimo octogesismo sexto Karolus Calvus Francorum rex,
Romanorum postmodum imperator, ad coercendos excursus improbos adhuc gentilium
Normannorum, qui Galliam qua in parte Britanniam respicit eo tempore piratico more pervaserant,
Robertum, illustrem genere virum et animi virtute prestantem, constituit Andegavensium comitem et
adiacentis patrie defensorem.
Hic ergo Robertus, post egregios de Normannis multiplicesque triumphos, cum eos die quadam in
prelio victos infra quandam ecclesiam fugere compulisset et variis armorum machinarumque
tormentis viriliter expugnare niteretur inclusos, exarmato capite pro mitigando fervore solis lenioris
aure blandimento, propius ut suos animaret accedens, et sagitta vulneratus, vitam et victoriam simul
amisit et dimisit christiani nominis inimicos non minus exultantes quam insultantes, quod salvati
forent inde pagani, ab ecclesia videlicet, unde confusi fuerant christiani. |
