| Quotation |
Nuper cum tu hospes optabilis Cuno, pater caenobii Sigebergensis, nostrum presentia tui serenares
habitaculum, nos more solito semoti a caeteris aliqua conferebamus de sanctarum maiestate
scripturarum.
Erat autem nobis tunc sermo precipuus de quattuor illis grandibus bestiis ex visione Danihelis,
quarum prima quasi leaena, ipsa fuit regnum Babiloniorum; alia similis urso, ipsa fuit regnum
Persarum et Medorum; alia quasi pardus, ipsa fuit regnum Grecorum; quarta terribilis atque mirabilis
et fortis nimis, dentes ferreos habens magnos comedens atque comminuens et reliqua pedibus suis
conculcans, ipsa fuit regnum Romanorum; quorum videlicet regnorum singula suis temporibus super
caetera gentium regna principatum tenuerunt. |
