| Quotation |
Mattheus uero, qui credentibus ex Ebreis suum scribebat euangelium, quod in gentium quoque
notitiam erat peruenturum, recte duos illuminatos commemorat, ut ad utrunque populum unam
eandem que fidei gratiam pertinere doceret.
Proficiscente igitur Domino et discipulis eius et plurima multitudine de Iericho, duo caeci sedebant
iuxta uiam, quia ascendente ad caelos Domino et multis fidelium sequentibus, immo cunctis ab initio
mundi electis una cum illo ianuam regni caelestis ingredientibus, mox uterque et Iudeorum et
gentium populus diutina perfidia caecus audito Saluatoris aduentu suae salutis atque illuminationis
spem coepit habere.
Secus autem uiam sedebant, quia uidebantur quidem legis habere notitiam, sed uiam quae Christus
est ignorabant, quod alter scriptam legem, alter naturalem sequens sine Christo caecus erat. |
