| Quotation |
Hoc quod ante dixerat "implete mensuram patrum uestrorum", ad personam Domini pertinere, eo
quod occidendus esset ab eis, potest ad discipulos eius referri, de quibus nunc dicit: "ecce ego mitto ad
uos profetas et sapientes et scribas et reliqua".
Simulque obserua iuxta Apostolum scribentem ad Corinthios uaria dona esse discipulorum Christi:
Alios profetas, qui uentura praedicant; alios sapientes, qui Christum agnoscentes nouerint, quando
debeant proferre sermonem; alios scribas in lege doctissimos, ex quibus lapidatus est Stephanus,
Paulus occisus, crucifixus Petrus, flagellati in Actibus apostolorum discipuli, et persecuti eos sunt de
ciuitate in ciuitatem, expellentes de Iudea, ut ad gentium populum transmigrarent. |
