| Quotation |
Itaque, quamdiu uixit Moyses et alloquebatur Iudaeorum populum, uelamen habebat in facie sua;
mortuo autem Moyse, Ihesus Naue iam non per uelamen sed facie reuelata et presbyteros
alloquebatur et populum; et nemo trepidabat, cum utique et ipsi dixerit Deus quod cum ipso ita esset
futurus, ut fuit cum Moyse, et eum similiter illuminaret gestorum utique, non uultus gloria, hoc
significante Spiritu sancto quod uenturus esset Iesus uerus, ad quem si quis conuerteretur et eum
uellet audire, de corde suo uelamen auferret et reuelata facie uerum saluatorem uideret.
Ergo Deus omnipotens Pater, qui in Moysi facie excaecauit populum Iudaeorum non duricia sed
praescientia, nec malicia sed aequitate atque iusticia, - ipsi enim sibi posuere uelamen, qui legem
intelligere noluerunt; lex enim spiritalis est, sicut dixit Haebraeus -, (...) iste, inquam, Dominus
illuminauit cor populi nationum in facie Christi Ihesu per eius aduentum, quod euidenter apostolico
declaratur exemplo, sicut scriptum habemus: Quoniam Deus, qui dixit de tenebris lumen
splendescere, illuxit in cordibus nostris ad illuminationem | scientiae claritatis Dei in facie Christi
Ihesu.
Ideo ergo dicit Dauid ad Dominum Ihesum: Vultum tuum illumina super seruum tuum. |
