| Quotation |
Non ei sufficere uisum est, quod labium, quod omnibus unum erat, et sermones quos eosdem habebat
omnis terra, confudit in constructione Babylonicae turris, atque ita remouit omnes gentes a lectione
Scripturarum, quas erat traditurus uni scilicet Hebraeae genti.
Nam et in illa Dei gente unica, quae legem accipiebat, cui credebantur eloquia Dei, non defuerunt nec
defuturi erant porci uel canes huiusmodi margaritis caelestium sacramentorum indigni et quibus
omne sanctum non deberet dari, quod fieret uel factum esset, si nudo sermone absque figuris et
aenigmatibus lex et prophetae fuissent elocuti.
Proinde igitur talem Scripturam condidit, quae non facile posset intelligi quo tenderet, uel quale
contineret mysterium regni Dei: et sicut ipse tunc fecit, ita docet cum dicit: Nolite sanctum dare
canibus, neque mittatis margaritas uestras ante porcos. |
