| Quotation |
Perduxique opus usque dum eiectus adam de paradiso uoluptatis exilium uitae temporalis intrauit.
Aliqua etiam de sequentibus sacrae historiae, si deus uoluerit auxilio uestrae intercessionis comitante,
scripturus, dum primo librum sancti esrae prophetae ac sacerdotis in quo christi et ecclesiae
sacramenta sub figura, solutae longae captiuitatis, restaurati templi, reaedificatae ciuitatis,
reductorum in hierosolimam uasorum quae abducta, rescriptae legis dei quae incensa fuerat, castigati
ab uxoribus alienigenis populi, et uno corde atque anima in dei seruitium conuersi, ut propheta simul
et historicus conscripsit, parum perscrutatus fuero, et aliqua ex his quae commemoraui sacramentis
apertiora studiosis, deo fauente, reddidero. |
