| Quotation |
Quo facto, prosperior aura spirans a Flandria dominum archiepiscopum in Angliam felici nauigatione
perduxit, uenientemque ad portum cui Sandwicus nomen est regii satellites exceperunt, custodiis per
litora dispositis, ut creditur, ad nocendum, et armatis perstrepentibus, quos ante fatus Iohannes de Oxeneford cohibuit et compulit arma deponere, non tam, ut putatur, fauore nostrorum, quam ne temeritas eorum dominum regem et liberos suos nota proditionis inureret.
Exegerunt tamen ut alienigenae, qui cum archiepiscopo uenerant, sacramentum praestarent de
seruanda fidelitate regi et regno.
Nec apparebat quisquam alienigena praeter Simonem Senonensem archidiaconum, qui ad
praestandum iuramentum facile fuisset inductus si archiepiscopus permisisset; qui exempli perniciem
ueritus respondit bonis moribus hoc prorsus esse contrarium, ut inaudita barbarie compellerentur
hospites et peregrini ad huiusmodi iuramenta. |
