| Quotation |
Alienigena uero puer est et ancilla furor et concupiscentia, quos semper dominatu rationis ad
obsequium per fortitudinem ac temperantiam theoreticus subiugat animus, omnino eis non dans ad
libertatem remissionem, donec deponatur perfecte lege spiritus nature lex, ueluti ab infinita uita carnis aggrauantis mors, et omnis imago regni carentis principio pure ostendatur, que omnem principalis
exempli per imitationem possidet formam, in qua factus theoreticus animus, furorem atque
concupiscentiam liberos facit, eam quidem ad immortalem diuini amoris uoluptatem et
incontaminatam caritatem transformans, eum uero ad ardorem spiritualem feruentemque semper
motum sapientemque insaniam transferens, in qua, ut uerisimile, magnus immortalis luminis radius,
magnus apostolus Paulus, factus, in Actibus audiuit a rege Agrippa insanis Paule, et iterum ipse, de se
ipso ad Corinthios scribens siue mente excedimus deo siue sapientes sumus uobis, sapientem in deo
insaniam mentis excessum uidelicet uocauit, extra quippe ea que sunt per se ipsam sapientem facit
intellectum.
Horum uero numerum significare opinor temporalem secundum rationem cum impassibilitate
morum prouidentiam, per quam et rationi et intellectu ueluti Ebreis pueris et ancillis seruientibus in
actionem superpositus animus diffinit mensuras horum secundum uirtutem obsequium transferens
ad theoriam, furoris quoque concupiscentieque ut alienigenum puerorum et ancillarum curam
gerens, ueluti seruorum dominus, ad condignam in fine ducit libertatem, concupiscentiam quidem
faciens perfruentem diuinis dilectionem, furorem uero perfruentis dilectionis incessabilem uigorem, et
Ebreos ueros per gratiam faciens alienigenas. |
