| Quotation |
Evidenter ostendit quia non erit apud illum populum primatus nec permanebit apud eum victoriae
palma, sed in manu mulieris, cui nomen Iahel, tradetur Sisara.
Describitur autem quod, cum secundum commonitionem Debborae, id est prophetiae, insequeretur
Barac principem Allophylorum Sisaram, ipse quidem eum comprehendere non potuit, sed occurrit ei
fugienti mulier alienigena Iahel, quae mulier prius cum eo amicitiarum foedus habuerat; ad quam
ille cum declinasset latendi gratia, aquam poposcit, ut biberet, sed ab illa lacte potatus est; et cum
eum in latebris collocasset ac pellibus adoperuisset, post haec palum malleo adactum per eius malas
- vel maxillas - defixit; et tunc occurrens insectanti Barac mortuum iam et prostratum ostendit
Sisaram. |
