| Quotation |
De cetero, frater karissime, noveris cum virtute summi opificis exercitum nostrum ordine praenotato Bari triumphis nostris summisa Saracenos Tarenti pariter et Calabriae mox mirabiliter humillasse simul et comminuisse hos celerius duce Deo penitus contriturum, si a mari prohibiti fuerint escarum ammittere copias vel etiam classium a Panormo vel Africa suscipere multitudines. Quapropter soecialis fraternitas tua, quia pr sicca nostrorum cunei populorum in utrisque locis vix aut nunquam deerunt, studeat necesse est sufficientem stolum destinare, qui et illos a recipiendis alimentis a mare coerceat, et si plurimas contingerit, sicuti saepe nunciatur, pessimae gentis advenire catervas, facilius illis resistere divine munito brachio valeat. Nam iste stratigus Georgius, licet sollerter invigilet et strenue pro suo posse decertare, non sufficiet obviare, si plures inimicorum naves ex parte qualibet apparuerint, non videlicet nisi pauca prorsus chelandia possidens. Et quia nonnulli Sarracenorum Panormi latrunculi cum sagenis solacio et refugio iam memoratorum Neapolitanorum freti per Tirrenum mare debachantur, oportet ut et hos capiendos tuae fraternitatis stolus sine dilatione mittatur. Isti sunt, qui et Calabritanis Sarracenis indefesse stipendia praebent et hiis qui Panormi sunt auxilia cotidiana ministrant; unde si capiantur, sagenae maxima ex parte Sarracenorum tam Panormi quam Calabriae constringuntur. Nos enim Calabria Deo auctore purgata Siciliam pristinae disponimus secundum commune placitum restituere libertati. Quod tanto erit utrumque facilius, quanto illi divina dextera captis navibus et latrunculis fuerintt amplius et celerius infirmati. |
