| Quotation |
Domino omnipotenti, munerum spiritalium magnarumque virtutum largitori, multiplices gratias laudesque sedulas dicere debemus, qui, omnium creaturarum visibilium et invisibilium conditor et gubernator exsistens, filium suum unigenitum dominum nostrum Iesum Christum ad docendas redimendasque omnigenas gentes misit ad terras; qui, causa salutis humanae ex Maria virgine carnem sumens inmaculatam, omne humanum genus a primo homine diabolica persuasione seducto venditum zabulique sub cruentissimum iugum redactum morti poenisque perpetuis addictum de potestate tenebrarum principis dignatus est eripere, dehinc omnes homines ab Adam usque ad Christum demonica fraude peccatorum catenis ligatos maximisque scelerum ponderibus oppressos ex omnibus orbis climatibus nunc per se liberatos vocavit ad vitam, ita dicens: Venite ad me omnes, et reliqua. (...) Qui, duobus decim apostolis de turba tocius generis humani electis, alios quoque alterius ordinis sexaginta et duos, factis regionibus albis, ne multae operarii deessent messi, iubet omnipotens discipulos esse suos hosque in cenaculo Sion sancto spiramine repletos omniumque linguarum mirabili dono ditatos ad docendas baptizandasque omnigenas gentes ire precepit, dicens: Ite, docete omnes gentes, et reliqua. (...) Unde Deus omnipotens, cui cura est de omnibus, qui vult omnes homines salvos fieri, populis in occidentalibus mundi partibus positis, errorum tetris caliginibus caecatis diabuloque subiectis, peccatorum mole depressis facinorumque cloaca convolutis, divinis muneribus decoratum, signis ac virtutibus in multis orbis partibus notum, Audomarum apostolicum donavit doctorem. |
