| Quotation |
Porro Francorum regnum Brunichildis regina cum nepotibus Teodeberto atque Teoderico, filiis Hildeberti regis, iam maioris aetatis metas attingentibus, fortiter regebat.
At vero gens Langobardorum Italiam a partibus Venetiarum dudum, ut supra praelibavimus,
ingressa, maxima ex parte cladibus afficiendo suae potentiae subdere conabatur.
Procedente deinde tempore, iamque Foca imperium administrante Romanum, qui Mauricium
imperatorem cum filiis Teodosio, Tiberio atque Constantino, cum esset strator Prisci patricii, dolo
interemerat, praefata gens, duce Agilulfo, quem sibi regem praefecerat, totam poene inrumpit Italiam
Romanamque aggreditur urbem. |
