| Quotation |
ergo qui moribus praecepta dei facit, et quodam modo uiuendo, semper in corde suo ne deleatur agit
quod tenet, uiuendoque se commemorat quid ei in corde scriptum sit de lege dei, ipse fructuose tenet
legem dei; ipse non inimicus deputabitur.
nam ecce inimici iudaei, quos uidetur significare psalmus iste, legem dei tenent, et ideo de illis dictum
est: ne occideris eos, nequando obliuiscantur legis tuae, ut gens iudaeorum maneret, et ea manente
cresceret multitudo christianorum.
per omnes gentes manent certe, et iudaei sunt, nec destiterunt esse quod erant; id est, gens ista non ita
cessit in iura romanorum, ut amiserit formam iudaeorum; sed ita subdita romanis est, ut etiam leges
suas teneat, quae leges sunt dei. |
