| Quotation |
Protinus edicto producitur imperiali
Ex cunctis ingens populis exercitus illi
Subiectis; et cunctarum validissima
Copia, quas tanti belli instrumenta gerendi
Poscebant, vigili cura studioque paratur.
Sed numerosa nimis quoniam produxerat ex hoc
Agmina, per partes eadem seiunxerat, ac sic
Pannoniam, gens Hunorum quam seva tenebat,
Tramite distante, longo penetrare sategit.
Tunc unam populi partem comiti Theodrico,
Atque Magenfrido, ducibus hoc tempore primis,
Committens, aquilonales per fluminis horas
Danubii praecepit eos iter accelerare;
Ipse per australis tendebat litoris agros,
Milibus innumeris stipatus et agmine forti. |
