| Quotation |
Motae sunt quoque in ea gentes, dum auditis siue uisis domini et apostolorum eius uirtutibus, adeo stupefactae et miratae sunt, ut anathematizatis abiectisque eis quos coluerunt diis, nouam Christi fidem deuota mente susciperent, de quibus apte subditur: ADAPERIENT ORA SVA SICVT PAVPER
EDENS IN OCCVLTO.
Sicut enim pauper aliquamdiu ieiunus permanens, si forte alicubi cibos inuenerit, his se confestim in
occulto reficere satagit, neque eos in publicum uult proferre, ne forte ab alio diripiantur, et ipse fame
pereat; sic nimirum sic populi gentium, oblato sibi per apostolos pane uerbi, a quo diutius ieiuni
durauerant, mox aperuerunt ora sui cordis, et hunc omni auiditate gustare coeperunt, tanto amplius
audiendis siue legendis scripturis operam dantes, quanto se minerunt diutius miserrimo genere
paupertatis, superuacuis immo etiam noxiis aures atque animum mancipasse doctrinis.
|
