| Quotation |
Et quidam uir Lystris infirmus pedibus sedebat, et cetera. Sicut claudus ille quem Petrus et Iohannes ad portam templi curant salutem praefigurat Iudaeorum, ita et hic Lycaonius aeger populum gentium longe a legis templique religione remotum sed Pauli apostoli praedicatione collectum. Dextras, inquit, dederunt mihi et Barnabae societatis ut nos in gentes, ipsi autem in circumcisionem.
Sed haec tempora expositioni conueniunt; nam ille primis fidei temporibus, cum necdum gentibus
uerbum crederetur, hic uero Iudaeis ob perfidiam expulsis et damnationis puluere respersis inter noua conuersae gentilitatis gaudia sanatur. |
