| Quotation |
Et ideo non solum ex iudaeis, sed ex gentibus secundum carnem christus aduenit, ut ex quacumque gente christo credidissent, iam arram salutis suae in christi carne haberent.
Ac per hoc botrus cipri id est ex iudaeis et ex uineis engaddin, hoc est de populo gentium fratrem
suum id est christum dicebat ecclesia quae corpus est christi.
Hic est botrus quem in falanga speculatores a moise missi de terra repromissionis adtulerunt; terra
repromissionis corpus erat mariae uirginis, botrus in falanga corpus domini, inter duos populos
falanga adlatus, ut qui prior ibat, iudaeorum typum ostenderet, qui post se christum relicturi erant;
qui uero posterior ueniebat, christianorum populum indicabat, qui praecedentem christum tanquam magistrum discipulus et seruus dominum suum secuturus erat. |
