| Quotation |
Idcirco dicitur: IVNCTA EST ITAQVE PVELLIS BOOZ ET TAMDIV CVM EIS MESSVIT DONEC ET
ORDEVM ET TRITICVM IN HORREVM CONDERENTVR.
Fidelis itaque plebs gentilium tamdiu Ecclesiis quae sunt in Christo, cohaeret in meditatione
Scripturarum et cum eis sacra metit documenta praedicatorum, donec ueteris et noui Testamenti
notitiam in cellaria cordis recondat, unde pastum animae habeat sufficientem; uel tamdiu cum eis
iuncta metit iustitiae frugem, donec in nouissimo die ordeum et triticum, id est populus Iudaeorum
quibus uelut iumentis uetus datum est Testamentum, et populus gentium quibus noui gratia
Testamenti ad refectionem est collata; uel donec ordeum et triticum, id est genus electum et regale sacerdotium, populus scilicet et clerus, quorum alter ordeo, id est grossiori Scripturarum uescitur
alimento, alter mysterio subtiliori, quasi tritico, quo etiam in altaris cotidiano utitur sacramento; uel
donec ordeum et triticum, id est damnandi et saluandi, illi ob culparum paleam, illi ob uirtutum
similam, purgata iudicii uentilabro area Ecclesiae, in horreum recondantur, quale sortita est uita
praeterita singulorum.
|
