| Quotation |
Igitur a beato Forannano directis undique vernaculis ex congregationibus a se constructis, abbates
cum honestioribus ecclesiarum ad hoc obsequium convocavit, et ex auditu istius commotionis
congregata est non minima multitudo monachorum cum abbatibus, exceptis clericis et monialibus.
Proximorum autem et nobilium virorum ex hoc accidenti graviter commotae innumerabiles catervae
congregantur, de quorum planctu, gemitu, ploratu et contritione patriae fit commotio, et ex hac
commotione moerentium affectus dolorem facit ceterarum gentium nationibus.
Beatus igitur Forannanus cum turbis monachorum, clericorum et nobilium virorum et cum
innumerabili sexu gentis utriusque, virorum et mulierum, venerabile corpus egregii comitis a loco illo
transferens, quo defunctus hominem exuit, usque ad basilicam Walciodorensis coenobii deduxit et ibi
eum in condigno loco honorifice sepelivit, in eo videlicet quo se disposuerat sepeliri. |
