| Quotation |
O Germania, aliarum prius iugo depressa gentium, sed sublimata modo inperiali decore, regem
fideliter serviendo dilige eumque, quantum poteris, iuvare conare, princepsque ne desit ab illo genere,
optare ne cesses, ne despoliata gradibus honorum omnibus prioris redeas ad statum servitutis!
Memoratus igitur Heinricus, qui regnum susceperat, iam magis gradus ascendens superiores quaeque regna per circulum bello potens suo subiugaverat dominatui, scilicet Sclavos, Danos, Bawarios,
Behemos ceterasque gentium nationes, quae Saxonico numquam subesse videbantur inperio.
Quid mirum totiens inimicos superando tante adquisisse triumphum victorie, cum summo
triumphatori regique celesti agens semper gratiarum actiones ecclesias multis reparari fecisset
inpensis? |
