| Quotation |
Nam cum duodecim apostoli, accepta per spiritum sanctum omnium locutione linguarum,
inbuendum euangelio mundum, distributis sibi terrarum partibus, suscepissent, beatissimus Petrus,
apostolici ordinis princeps, ad arcem Romani destinatur imperii, ut lux ueritatis quae in
omnium gentium reuelabatur salutem, efficacius se ab ipso capite per totum mundi corpus
effunderet.
Ad hanc ergo tu urbem, beatissime apostole, uenire non metuis, et consorte gloriae tuae Paulo
apostolo aliarum adhuc ecclesiarum ordinationibus occupato, siluam istam frementium bestiarum ac
profundum superstitionis oceanum, constantior quam cum super mare gradereris, ingrederis.
Nec mundi dominam times Romam, qui in Caiphae domo timueras sacerdotis ancillam. |
