| Quotation |
Barbarismus autem dictus est a barbaris gentibus, quoniam, quando Romani totum sibi
subiugauerunt orbem, placuit eorum principibus de una quaque gente prouinciisque Romam
adducere causa discendi latinitatem uidelicet linguam Romanam, diuersas ob causas: siue ut
quiuissent cum eorum loqui principibus illi subiugati et principes Romanorum econtra cum
ipsis subiugatis; seu etiam ut scirent posteri eorum subiectos fuisse se dudum Romanis.
Illi autem subiugati, postquam coeperunt latinam discere linguam, corruperunt eam decretumque est
ab illis Romanis illud uitium appellari barbarismum a barbaris nationibus, id est alienationem.
Et inde inoleuit mos, ut, quotiescumque aliqua pars in propria lingua ab aliquo corrumpitur,
barbarismus appelletur. |
