| Quotation |
Cumque plures ex Francis dolere contra se cerneret, iam dicto Dei famulo Ragneberto imputare studuit, quod tale consilium cum duobus palacii proceribus Bodone et Uniscando nominibus habuisset initum, ut iam dictum Ebroinum absque decreto regis conarentur occidere. Sed cum hoc ipse nec prodere vellet crimen nec denegare facinus, intercedente Dei famulo Audoeno pontifice, Rodomae urbis praesule, cuius fama sacerdotii illo tempore orbem repleverat Galliae, non est continuo interfectus; sed cuidam viro potenti Theudefredo nomine partibus Burgundiae in exilio commendatur, eo scilicet factionis obtentu, ut dum in exilium trusus crederetur, absque Francorum improperio latenter morte perimeretur. |
