| Quotation |
Inde progressus, castra metatus est in campo, ubi Merseburgensis aecclesia sita est, et videns locum
desolatum et in nichilum redactum, ingemuit et ait: Beate Laurenti, martir Christi, si tuo interventu
has barbaras nationes, ad quas pergo, Romano imperio et christianae religioni subiugavero, hunc
locum desolatum, tuo nomine consecratum, divina favente gratia, in pristinae dignitatis statum
reformabo.
Ut vero principes Poloniae et Boemiae caeterarumque Sclavicarum gentium primates Romanum
imperatorem cum exercitu ad debellandos eos advenire cognoverunt, innumerabili multitudine
barbarorum collecta, in bellum ei obviam processerunt.
Quod regi pio per speculatores suos cito innotuit, et, sicut in omnibus angustiis suis solebat, ad
orationis arma confugit. |
