| Quotation |
Habes igitur, serenissime imperator, amministrante caritate chronicum opus, excerptum non nostra
set veterum chronographoruma auctoritate, utinam non indignum, ne dicam oculis imperatoriis, set
saltim minimis lectoribus tuae curiae.
Cum igitur tota intentio huius libri tam Romani imperii quam Teutonici regni deserviat honori,
quorum regnorum coniunctio cepit a Karolo Francigena, necessarium duximus, tam nobilissimae
gentis, que habilis inventa est ad procreandos dominos Romanae potentiae, altius originem repetere,
et sic per antiquissimae nobilitatis generationes usque ad eundem Karolum narratione deducta,
qualiter ipse capesseret rem publicam labefactam, et qualiter deinde Romanum imperium per
successiones regum istius gentis excellentissime gubernaretur, ceteris chronicis relationibus exclusis,
competenti brevitate usque ad haec tempora digerere.
Primus igitur liber ab origine Francorum per regnum eiusdem gentis tempora discurrit. |
