| Quotation |
Defuncto Vallia, Theodericus regnum accepit, ad quem, ut supra dictum est, Herimundus, filius
Thurismundi, nepotis Ermenrici, spreto regno Ostrogotharum propter Hunorum dominium, se
contulit.
Inter haec regnantibus Marciano in Oriente et Valentiniano in Occidente, Attila, rex Hunorum
omnium et solus regnator pene cunctarum Scythicarum gentium, confisus in multitudine
fortissimarum gentium, quas sibi subiugaverat, Macedoniam et Moesiam, Achaiam et utramque
Datiam, Traciam et omne pene Illiricum devastaverat, posuitque in animo suo, venire ad dissipandum
occidentale imperium, hoc est Romanum.
Erat namque sub eius potestate nominatissimus Gepidarum rex Hardericus, eminentior ipso cui
serviebat, et Ostrogotharum rex Walamir cum fratribus suis Dietmaro et Witimaro, necnon fortissimae
gentes, Marcomanni, Suevi, Quadi, Heruli, Turcilingi, Rugi et aliae barbarae gentes, quae habitabant
in partibus aquilonis. |
