| Quotation |
Tempore Heinrici IIII. Romani, et Alexii Constantinopolitani principis, iuxta presagium euangelicum
surrexit undique gens contra gentem et regnum adversus regnum, et terraemotus magni erant per
loca, et pestilentiae et fames terroresque de caelo et signa magna; et quia iam in omnes gentes
euangelica tuba iusti iudicis adventum preconabatur, ecce etiam totum circumquaque mundum signa
prophetata portendentem universalis aecclesia contemplatur.
Iam Hierosolima Sarracenis civibus possessa, Babyloniae, quae nunc sedes est regni Aegyptii,
serviebat, iam tenuis in ea christianae professionis religio cotidiano se tributo redimebat. |
