Quotation |
Deinde Constantinopolim laboriose satis a tanta multitudine ventum est.
Ubi Romanorum rex a Grecis callide circumventus ac principibus quibusdam auro et argento illectis
iter per desertum quoddam versus Iconium ingressus est, obsequium se arbitrans prestare Deo, si
quascumque gentes christianis infestas subiugare Christo vel humiliare atque infirmare potuisset, sed
Grecis, quorum id erat consilium, inimicorum suorum humiliationem [potius], quam christiani
nominis propagationem intendentibus.
Igitur exercitibus in duo divisis rex Romanorum cum suo exercitu versus Iconium viam ductu
Grecorum ingressus est per desertum; rex vero Francie cum exercitu sibi adunato versus Antiochiam
et Ierosolimam viam, ut ceperat, tenuit aliis per mare, aliis per terram tendentibus. |