| Quotation |
Sollerter itaque perscrutatis veteribus et modernis codicibus, cronographyam edidit, in qua ab inicio
mundi, ex quo Deus Adam de limo terrae plasmavit, per omnes libros veteris et novi Testamenti et
Romanorum Grecorumque historias discurrens, optima quaeque collegit, et enumeratis annis per
regum et consulum tempora usque ad diem mortis suae, annalem hystoriam laudabiliter distinxit.
Quem prosecutus, Iohannes acta fere centum annorum contexuit iussuque venerabilis Wlfstani
pontificis et monachi supradictis cronicis inseruit; in quibus multa de Romanis et Francis et
Alemannis aliisque gentibus, quae agnovit, utiliter et compendiose narratione digna reseravit.
In his utique cronicis continentur omnes iudices et reges et pontifices Haebreorum a Moyse usque ad
subversionem Ierosolimorum, dum sub Tito et Vespasiano pro nece Salvatoris et martirum eius iuste
destructum est regnum Iudeorum. |
