| Quotation |
Post aliquot annos rebellantibus Alanis contra Valentinianum imperatorem, cum eos non posset imperator penitus debellare, eo quod eos intransibiles Meotis paludes tutarentur, proposuit Valentinianus, quod, si qua gens has paludes intrare et rebelles Alanos posset conterere, decem annis eos a tributis liberos redderet. Hac pactione Troiani illecti, et fortitudine et prudentia sua confisi, duce Priamo Meotidas paludes Romanis invias ingressi, Alanorum gentem exterminaverunt, et ita Valentiniano satisfecerunt.
Valentinianus eorum virtute delectatus, eos, qui prius vocati erant Troiani, deinde Antenoridae,
postea etiam Sicambri, Francos Attica lingua appellavit, quod in Latina lingua interpretatur feroces. |
