| Quotation |
sicut etiam res ipsa nihil ea prorsus potuisse patefecit. Sed et hoc silentio nequaquam praeteriri patiar, quod mithridates rex asiae ubique in asia
peregrinantes ciues romanos atque innumerabili copia suis negotiis intentos uno die occidi iussit; et
factum est. Quam illa miserabilis rerum facies erat, subito quemque, ubicumque fuisset inuentus, inopinate atque impie fuisse trucidatum! quis gemitus morientium, quae lacrimae spectantium, fortasse etiam
ferientium fuerunt! quam dura necessitas hospitum, non solum uidendi nefarias illas caedes domi
suae, uerum etiam perpetrandi, ab illa blanda comitate humanitatis repente mutatis uultibus ad
hostile negotium peragendum, mutuis repente ut ita dicam omnino uulneribus, cum percussus in
corpore et percussor in animo feriretur! vbi ergo erant illi dii uestri, qui propter exiguam fallacemque huius mundi felicitatem colendi existimantur, cum romani, quibus se colendos mendacissima astutia
uenditabant, tantis calamitatibus uexarentur? |
