| Quotation |
In nomine domini et salvatoris nostri Iesu Christi anno incarnationis eius Mo centesimo tricesimo
octavo, indictione prima, septimo idus Iulii, anno autem imperii domini Lotharii cesaris invictissimi
imperatoris augusti sexto, residente eodem invictissimo imperatore ad Aquas pensiles, consedente
etiam Peregrino patriarcha Aquilegensi cum archiepiscopis et episcopis abbatibusque quampluribus
causidicus pro Romana ecclesia directus est Gerardus cardinalis tituli sancte Crucis nec non et Guido
cardinalis, qui ambo postea Romanam rexerunt ecclesiam, Aymericus cancellarius et diaconus
cardinalis, Balduinus presbiter cardinalis, qui post Pisanorum archiepiscopus factus est, et Norbertus
Clarevallensis abbas ac alii quamplures civitatis Romane nobiles.
Ex parte Casinensis ecclesie auditores extiterunt Henricus dux Baioarie gener imperatoris, Conradus
dux Suevie, qui postea Romani imperii sceptra suscepit, Otto de Burchisin consobrinus imperatoris,
Fredericus marchio Anchonitanus, Malaspina marchio Ligurie, Henricus episcopus Ratisponensis,
Anno episcopus Basiliensis, Anno abbas Luneburgensis, Gualfridus palatinus iudex Romani imperii. |
