| Quotation |
Itaque eorum laudabile institutum pro modulo meo sequens, facultate qua valeo scribere nitor virtutes
et miracula, quae Deus per sanctos suos modernis temporibus facere dignatus est, quorum sacri
cineres regionem nostram inlati cotidie fidelibus causa salutis existunt, credens, me non inaniter,
immo utiliter et mihimet ipsi et multis aliis laborare; mihi quidem, quia praemium laboris mei cum
eis, quos ob laudem Dei in simili opere sudantes imitatus sim, me habiturum esse, per Dei gratiam
confidens, aliis vero, quia rebus cognitis veneranda sanctorum solemnia fidelius amplectuntur, et
maiore mentis devotione accensi, in laudem Creatoris sui laetius adsurgunt.
Temporibus igitur Hludowici imperatoris, qui post genitorem suum Karolum Magnum imperatorem
per annos 27 Francorum tenuit imperium, multorum reliquiae sanctorum ab urbe Roma in Franciam delatae sunt, quarum aliae quidem ab eis adductae sunt, qui iussu dominorum suorum, ut id
efficerent, Romam profecti sunt, aliae vero per clericos sanctae sedis apostolicae et cives Romanae
urbis allatae, vel per viam qua ferebantur vel in locis quibus susceptae et conditae sunt multis et
magnis miraculorum signis, cuius essent apud Deum meriti, claruerunt.
Constat namque, reliquias sancti Sebastiani martyris ab urbe Roma devectas et ab Hilduino abbate
apud Augustam Suessorum Galliae civitatem in ecclesia sancti Medardi confessoris venerabiliter
conditas, tantis et tam inauditis omnibus retro generationibus florere miraculis, ut relatio eorum fidem
excederet, nisi certum esset omnibus fideliter credentibus, quod deus et dominus noster Iesus
Christus, qui gloriosus est in sanctis suis, mirabilis in maiestatibus faciensque prodigia, omnia
quaecumque voluerit in caelo et in terra sine ulla difficultate potest efficere. |
