| Quotation |
Quamuis enim et cottidie circumcidantur iudaei ab his qui ante erant gentiles, id est doceantur de lege
et prophetis, de fide christi domini scilicet saluatoris: qui si crediderint, et ipsi salutis remedium
accepturi sunt: perseuerantes autem in duritia mentis lapideae, aeterno erunt iudicio detinendi.
Ideoque et dominus in eorum contradictione pertinaci dicebat quod filii eorum, id est pagani ipsi,
erunt iudices eorum atque doctores, id est gentium populus, qui ante in mente lapidea uersabatur,
postea uero per christi fidem merebatur ad scientiam salutarem peruenire.
Israhel autem secundum legem currens, ut scriptum est, ad legis uirtutem peruenire non potuit, quia
non ex fide, sed ex operibus currere properabat. |
