| Quotation |
Ex hoc loco incipit Iudaeorum populum commendare etiam de ipso casu infidelitatis, ut non
superbiant gentes, quia etiam casus Iudaeorum tam pretiosus extitit pro salute earum, sed magis
cauere debent, ne dum superbiant, similiter cadant.
Si delictum, inquit, illorum tanto profuit mundo, ut eorum dispendio plures habeat bonos, id est si
infidelitas Iudaeorum tanto profuit gentium populo qui hic mundi nomine designatur, ut plures ex
eis saluentur, et si diminutio eorum, hoc est damnum promissionis, siue testamentum, et legislatio, et
obsequia cultus Dei, quae omnia diuitiae illorum erant, diuitiae sunt gentium, per id quod lucrati sunt
uitam aeternam, quanto magis diues erit mundus, si et hi qui caecati sunt conuertantur.
Constat ergo amplius accepturos esse christianos quando Iudaei in fine crediderint, quam modo
uidentur in delicto ipsorum gratiae munere consecuti. |
