| Quotation |
Praecipit tamen deus et hoc, ut, si quis primo mense vel immundus in anima hominis, id est mortui
attactu pollutus, vel extra electum sacrificiis Hierosolymae locum in longinquo itinere constitutus
pascham non potuerit celebrare, secundo mense celebret.
Praevidens quippe deus gentium populos tunc adhuc hominum mortuorum simulacris immundos et
extra sanctum locum ecclesiae in longinquo positos - utique nos, qui eramus longe et facti sumus
prope in sanguine Christi - dat licentiam, ut, si primo mense nobis non occurrit et dies dominicus et
congruus lunae numerus, secundo mense celebremus.
- Et ideo nec intra quartam decimam lunam nec ultra vicesimam primam celebrare possumus, quia
septem tantum dies sunt azymorum paschalium, in quibus dominicum quaerimus diem. |
