Quotation |
Quia ergo ex gentilitate uenimus, sed sanctos iudaeae patres nobis in diuini amoris imitatione
proponimus, quasi quaedam cantorum gazophylacia ex latere portae quae uiam aquilonis respicit
sumus, sed ad uiam austri facies tenemus.
Et notandum quod haec eadem gazophylacia inter portam aquilonis et orientis esse perhibentur, quia
post incarnationem dominicam multitudo gentium ad fidem uenit, atque inter ipsos fideles populos
et sacramenta dominicae incarnationis quae medullitus diligunt, corda amantium surgunt.
Habeant ergo sancta gazophylacia, hinc orientis portam, et inde aquilonis, quia inter ipsa
redemptionis suae mysteria quae sequuntur, et carnales quosdam quos et intra sanctam ecclesiam
tolerant, multi in deum forti amore proficiunt, uirtutibus excrescunt, aeterni iudicis aduentum
quaerunt, et inter ea quae amant atque illa quae tolerant, quasi quaedam gazophylacia, diuitias
spiritus in mente seruant. |