| Quotation |
Ideo autem praecipiuntur transire per ministros ecclesiae, ut eos custodiant, ne aliquis illorum in
haereticorum prauitatem corruat, et ut in fide amplius etiam accrescant.
Praecipitur etiam custodibus murorum ut praeparent uiam populo uolenti intrare in ecclesiam, hoc
est ut doctrina et exemplo eis uiam rectitudinis ostendant planumque faciant iter, id est auferant
omnia offendicula dimittendo peccata per baptismum, et ut eligant lapides siue proiciant, ut
Septuaginta dixerunt, hoc est a cordibus hominum duritiam auferant infidelitatis uel separent a
consortio credentium reprobos et duricordes, qui noluerunt credere, necnon etiam praecipitur ut
eleuent signum crucis ad populum nationum, id est ut annuntient eius passionem et resurrectionem. |
